YIDIR ΣACUR D AZAMUL N UMENNUƔ ANMALAY

Ilul deg tefsut , yemmut deg tefsut, yeldi-d allen-is deg yebrir , yemdel-itent deg yebrir. Yidir Σacur : ilul deg useggas n 1968 deg tɣiwant n Tici, aɣiṛ n Bgayet.

Yidir Σacuṛ d ameɣnas asertan deg Ukabar Anemlay n Yixeddamen, d yiwen n wudem mucaɛen aṭas deg umennuɣ anmalay. Yidir Σacuṛ d win yefkan tudert-is i umennuɣ asratan u anmalay seg zik. Deg useggas 2008, amaray amatu n Usqamu n Tsennawiyin n Lezzayer, akamarad Σuṣman Redwan, yemmut. Seg imir , akamarad Yidir Σacur yuɣal d amaray amatu amaynut n unmalu n Usqamu n Tsennawiyin n Lezzayer almi d asmi yemmut , ass n 04 deg yebrir 2019. Ur ilaq ara diɣen ad nettu belli yella gar wid i d-yellan di tlalit n umaqun n yenmula imaniyen deg Lezzayer.

Ma nemmeslay-d ɣef urgaz-a mačč i taččart n yisebtaren n uɣmis-nneɣ, maca argaz-a yuklal ad yettwibder. Yidir Σacuṛ d win yellan ɣer tama n yixeddamen d yimelliẓen, d win yennuɣun s wul-is ur d yeclig ara deg cciɛa. Yidir Σacuṛ d azamul n umennuɣ ɣef yizerfan n yiselmaden. Yidir Σacuṛ d win yellan d amedya di tesnawit anda yesselmed , tasnawit Lḥemmadiya deg Bgayet. Yidir Σacuṛ tamuɣli-is d tagreɣlanit ur teqqim ara kan deg tlisa n wakal i d-yekker.

Tamurt-nneɣ d umaḍal sumata ḥwaǧen aṭas n yimeɣnasen am Yidir Σacuṛ. Ɣas teǧǧiḍ-aɣ, nekkni deg ubrid-ik ad nelḥu. "Sgunfu di talwit ay akamaṛad"

Aɛmeṛ BENḤEMMUC (Amar BENHAMOUCHE)

1- Anmalay : syndical / syndicalisme 1-2 Anmalu: syndicat 2-Akabar Anemlay n Yixeddamen: Parti Socialiste des Travailleurs (PST) 3- Asqamu n Tsennawiyin n Lezzayer : Conseil des Lycéens d'Algérie (CLA) 4- Amaqun n yenmula imaniyen: collectif des syndicats autonomes 5- tagreɣlanit: internationaliste. Fin de la discussion

Écrivez un message...