TIKLI N 14 YUNYU 2001: AMEZRUY N UMENNUΓ AΓEṚFAN

Yal aɣṛef yesɛa azemz yeqnen ɣer umennuɣ n tserkemt n wid yettwarzen d wid yettwaḥgfen. Deg umezruy n talsa ur nezmir ara ad nettu meɣṛes 1871 di Lpari d usbeddi n tɣiwant n Lpari naɣ yulyu 1936 d tegrawla taspenyulit mgal tafacit n Franku( Franco). Deg tmurt-nneɣ, 14 yunyu 2001 ad yeqqim deg umezruy.

Ass-nni, wid yudren ar Lezzayer tamanaɣt ssarmen udem amaynut i tmurt yečča unagraw asardasi aburjwa seg 1962. Tikli n 14 yunyu 2001 d tiririt i temharsit udabu , d taḍat n yelmeẓyen isuɣen : tilelli.

Mi tettuwexxeṛ temlilit n 07 di yunyu 2001, tella-d tayeḍ di 11 di yunyu 2001 anda i d-usan yimgensasen n yisemmesdiyen (tuqqniwin) n Wasunen d tɣiwanin n Waɣiren ( Lezzayer, Tubiret,Tizi Wezzu, Burǧ Buɛṛiṛiǧ d Sṭif). Akken neẓra, amgired yella-d deg temlilit n 07 di yunyu, aṭas n tneqqiḍan yettwakksen ladɣa timettiyin , tidamsanin, tella yiwet tessewham d tin yerzan tukksa n usaḍuf n twacult. Ihi leqdic ssulin-t s usufeɣ n yiwen n uttafttar n tmengiwin i wumi semman tiɣeṛɣeṛt n Leqseṛ. Deg tmengiwin-a llant : timettiyin, tidamsanin, tisertanin, tid n tuffɣa n yiǧadeṛmiyen deg tmurt Yiqbayliyen, asteɛṛef s wudem unṣib s tutlayt tamaziɣt. Wid yemlalen di temlilit-a frant di ṛṛay-nsen ɣef tikli n 14 di yunyu 2001 di Lezzayer tamanaɣt anda sersen attafttar-a , tiɣeṛɣeṛt n Leqseṛ, di tselwayt n tegduda.

Ass n 14 n yunyu 2001 di Lezzayer tamanaɣt, tikli-a tejmeɛ-d aṭas n yimesbaniyin i d-yusan qeccuc meccuc si yal tama n tmurt Leqbayel d kra n temnaḍin-nniḍen n tmurt. Iɣallen n tɣellist d wid i d-yessufɣen tacciwin-nsen, ur cuḥḥen ara i wid i d-yulin ad lḥun s talwit ɣef yizerfan-nsen. Ass n 14 yunyu 2001, anagraw asertan azzayri yesenɛet-d udem-is n tidet. Tikli-a n 14 di yunyu 2001 tegla-d s lexsaṛa tameqqṛant: lmeytin d yimejraḥ.

Deg yiḍ n 14 yunyu 2001, aneɣlaf amenzu, di tallit-nni, Σli Ben Flis, yewwet-d deg yimesbaniyen, isemm-aya-asen irebraben. Seg wass-nni adabu azzayri yugi akk tkliwin d tmesbaniyin deg Lezzayer tamanaɣt.

Tikli n 14 yunyu tessenɛet-d i umaḍal sumata amennuɣ n weɣṛef-nneɣ mgal adabu amharsan azzayri. Maca deg tirmi-a nufa-d belli mačči alma nuli qeccuc meccuc ɣer Lezzayer tamanaɣt i d-nezmer ad neɣḍel adabu. Aɣeṭṭul n uwanek aburjwa ad yili s turza n tsuddiwin-ines d tuṭfa n tɣiwanin d lluzinat, aqfal n yiberdan imeqqṛanen d usuddes deg yixeddim, deg tseddawiyin,deg yizenqan , deg tudrin, atg.

Σmeṛ BENḤEMMUC( Amar BENHAMOUCHE)

Amawal (Lexique) 01-Anagraw, unagraw: système 02- Asardasi: militaire 03- Tamharsit, temharsit: dictature 04- Aburjwa: bourgeois 05- usemmesdi (tuqqna) n wasunen d tɣiwanin n waɣir n Tizi Wezzu: Coordination des Daïras et des Communes de la Wilaya de Tizi-Ouzou 05-01) Asemmesdi (tuqqna): Coordination 05-02) Asun, Asunen, Wasunen: Daïra (s) 05-03) taɣiwant, tiɣiwanin, tɣiwanin: commune(s) 05-04) aɣir, waɣir, aɣiren: wilaya (s) 06- amgensas, imgensasen,yimgensasen: représentant (représentants) (représentants) 07- n usaḍuf (asaḍuf) n twacult: code de la famille. 08- aneɣlaf amenzu: premier ministre 09- Tirmi: expérience 10-Awanek, uwanek: État 11- Tasuddut, tisuddiwin, tsuddiwin: institution(s)