TAFSUT N YIMAZIƔEN, TAFSUT N YIMƔIDEN (AḤRIC wis 02)

Ass n 18 di yebrir 2001 deg tɣiwant n at Dwala, iǧadaṛmiyen n Lezzayer nɣan yiwen n yilemẓi n 18 d asseggas, Germaḥ Masinisa. Timenɣiwt-a tegla-d s lɣiḍ ameqqṛan n yimezdaɣ i d-yeffɣen s iberdan. Iɣallen n tɣellist d wid i yesxedmen takriḍt, d wid yewten akken ad nɣen.

Ass n 21 di yebrir iǧadaṛmiyen n Wad Amizur d wid yeṭṭfen 03 n warrac n uɣerbaz alemmas yeddan d uselmad-nsen n waddal s annar n ddabex. Tiyita-ya d tin i d-yessulin lɣiḍ n yinelmaden d yiselmaden n uɣerbaz ideg qqaṛen, ssawlen-d i yiwen n unejmuɛ i uzekka-nni. Aass n 22 di yebrir 2001, aneɣlaf n daxel di tallit-nni, yuɣal-d ɣer wayen yeḍṛan, yenna-d belli ilemẓi yettwanɣan , Germaḥ Masinisa , d win yeffɣen i yiberdan.

Kra n wussan kan ɣef tedyanin-a yessembawlen tamurt, llant-d temlilyin di tesdawit n Bgayet ideg d-ttassen yinelmaden, iselmaden, ixeddamen...atg. Ass n 29 di yebrir deg uxxam n umezgun n Bgayet, tlul-d tejmaɛt taɣeṛfant anda ara naf aṭas n yiferdisen n tmetti: ixeddamen, icumuren, inelmaden, atg. Tajmaɛt-a taɣeṛfant d tin yebdan leqdic-is si zik. Iswi-ines d tifin n tifrat i ccwal d tuffɣa s kra n tnegmiyin.

Ass n 17 di mayu 2001 deg Yilulen Umalu (Tizi Wezzu), ilul-d s wudem unṣib usemmesdi (tuqqna) n wasunen d tɣiwanin n waɣir n Tizi Wezzu. Di 04 junyu 2001, tella-d temlilit tamenzut i yezdin akk isemmesdiyen (tuqqniwin) n leɛṛac n tamurt.

07 di yunyu 2001 di Bgayet, tella-d temlilit n yisemmesdiyen (tuqqniwin) n wasunen d tɣiwanin n waɣiren ( Lezzayer, Tubiret,Tizi Wezzu, Burǧ Buɛṛiṛiǧ d Sṭif). Di tazwara llant 28 n tneqqiḍin d tnegmiyin maca amgared i d-yellan gar yiɛeggalen n yisemmediyen yessuder-d tinegmiyin ɣer 15 kan. Amgired yella-d ladɣa mgal tarbaɛt n tejmaɛt taɣeṛfant , yeǧǧa ad wexṛen timlilit ar 11 di yunyu di Leqsaṛ.

Mi tettuwexxeṛ temlilit n 07 di yunyu 2001, tella-d tayeḍ di 11 di yunyu 2001 anda i d-usan yimgensasen n yisemmesdiyen (tuqqniwin) n Wasunen d tɣiwanin n Waɣiren ( Lezzayer, Tubiret,Tizi Wezzu, Burǧ Buɛṛiṛiǧ d Sṭif). Akken neẓra, amgired yella-d deg temlilit n 07 di yunyu, aṭas n tneqqiḍan yettwakksen ladɣa timettiyin , tidamsanin, tella yiwet tessewham d tin yerzan tukksa n usaḍuf n twacult. Ihi leqdic ssulin-t s usufeɣ n yiwen n uttafttar n tmengiwin i wumi semman tiɣeṛɣeṛt n Leqseṛ. Deg tmengiwin-a llant : timettiyin, tidamsanin, tisertanin, tid n tuffɣa n yiǧedeṛmiyen deg tmurt Yiqbayliyen, asteɛṛef s wudem unṣib s tutlayt tamaziɣt. Wid yemlalen di temlilit-a frant di ṛṛay-nsen ɣef tikli n 14 di yunyu 2001 di Lezzayer tamanaɣt anda sersen attafttar-a , tiɣeṛɣeṛt n Leqseṛ, di tselwayt n tegduda.

Ass n 14 n yunyu 2001 di Lezzayer tamanaɣt, tikli-a tejmeɛ-d aṭas n yimesbaniyin i d-yusan qeccuc meccuc si yal tama n tmurt Leqbayel d kra n temnaḍin-nniḍen n tmurt. Iɣallen n tɣellist d wid i d-yessufɣen tacciwin-nsen, ur cuḥḥen ara i wid i d-yulin ad lḥun s talwit ɣef yizerfan-nsen. Ass n 14 yunyu 2001, anagraw asertan azzayri yesenɛet-d udem-is n tidet. Tikli-a n 14 di yunyu 2001 tegla-d s lexsaṛa tameqqṛant: lmeytin d yimejraḥ. Deg yiḍ n 14 yunyu 2001, aneɣlaf amenzu, di tallit-nni, Σli Ben Flis, yewwet-d deg yimesbaniyen, isemm-aya-asen irebraben. Seg wass-nni adabu azzayri yugi akk tkliwin d tmesbaniyin deg Lezzayer tamanaɣt.

Times n zzɛaf d tin yuɣen, tugi ad tnes am tin n wayyur ur n ɣuct. Imesbaniyen d wid yezgan d imenɣi yal ass d iǧadaṛmiyen d iɣallen n tɣellist. Ɣer waya meṛṛa, llan-d yisundiden , abellaɛ n yiberdan iɣelnawen d usṛaɣ n lbirwat n yikubar n tsertit d izumal n uwanek am yixxamen n tɣiwanin d wasunen, tiɣedmin,atg.

08 n wayyuren seld tanekra n uɣṛef , beṭṭu d iɣisi yella-d deg umussu n Leɛṛac, imi yebḍa ɣef 03 n trebbuyaɛ, yal yiwet teqqaṛ d nekk i d iles si yettmeslay ugdud. Ass n 06 di dujembeṛ 2001 , tella-d temlilit n udiwenni tamenzut gar unabaḍ azzayri d yimgensasen n Leɛṛuc. Ifer-a n Leɛṛac " idiwenniyen" i wimi semman yimdanen , di tallit-nni: Leɛṛac n ṭaywan.

Ikabaren mucaɛen di tmurt leqbayel am: Tirmi n Yiɣallen Inemlayen d Ugraw i Yidles d Tugdut, d wid i d-yeffɣen mgal amussu n leɛṛac d tuddsa n uɣṛef i d-yesnesren seg tecḍaḍt n yikabaren-a. Attekki-nsen deg tefranin, am tid n tɣiwanin di tubeṛ 2002 i Tirmi n Yiɣallen Inemlayen d tid n tselwit di yebrir 2004 n Ugraw i Yidles d Tugdut, d win yernan awexxeṛ d uɣunzu n uɣṛef fell-asen.

Tuɣalin n Ḥmed Uyeḥya ɣef uqeṛṛu n unabaḍ azzayi di 05 mayu 2003 yessaɛjel asexsi n ujajiḥ n tmes, yesseḍmeɛ wid yenwan uccen yettɛassa ɣef tqeḍɛit. Amrar ijbed-it almi d tazwara n useggas n 2005, yeǧǧa iɛeggalen n leɛṛac bḍan, agdud yeqḍeɛ layas deg-sen.

Tafsut taberkant d tin i d-yeglan s 128 n lmeytin d nig 5000 n yimejraḥ. Tafsut taberkant tkemmel i ucerrig yellan gar ugdud d udabu. Adabu yexdem akk ayen i yezmer ad teqqim tnekra-a di tmurt n Yiqbayliyen, yewwet s wayen i yezmer ad yessemsex amennuɣ n wid i d-yekkren mgal ẓẓur, tasihrant d lḥif. Akken tafsut-nneɣ ad teqqim s yijeǧǧigen ilaq-as ad tibrik , ad tizwiɣ s yidammen. Akka i d tudert, win yebɣan ad yidir yemmet! ilaq ad nennaɣ i tudert-nneɣ! Ad tidir tegrawla!

Aɛmeṛ BENḤEMMUC (Amar BENHAMOUCHE)

Tasuqilt (Traduction) : 1- Iɣallen n tɣellist: forces de l'ordre 2- takriḍt: violence 3- tejmaɛt taɣeṛfant: comité populaire 4- Tangemit, tinegmiyin, tnegmiyin: revendication, (revendications). 5- usemmesdi (tuqqna) n wasunen d tɣiwanin n waɣir n Tizi Wezzu: Coordination des Daïras et des Communes de la Wilaya de Tizi-Ouzou 5-1) Asemmesdi (tuqqna): Coordination 5-2) Asun, Asunen, Wasunen: Daïra (s) 5-3) taɣiwant, tiɣiwanin, tɣiwanin: commune(s) 5-4) aɣir, waɣir, aɣiren: wilaya (s) 6- amgensas, imgensasen,yimgensasen: représentant (représentants) (représentants) 7- n usaḍuf (asaḍuf) n twacult: code de la famille. 8- aneɣlaf amenzu: premier ministre 9- Asunded, isundiden, yisundiden: Grève (s) 10- izumal n uwanek : symboles de l'État 10-1) Azamul, izumal, yizumal: symbole (s) 10-2) Awanek, Iwanaken, Yiwanaken: État (s) 11)taɣdemt, tiɣedemin, tɣedemin: Sens 01: Justice (s) Sens 02: Palais de justice 12- timlilit n udiwni: rencontre de dialogue 12-1) adiwni: dialogue 12-2) idiwenniyen: dialoguistes 13- tifranin n tɣiwanin: les municipales ( élections communales ). 14- Tirmi n Yiɣallen Inemlayen : FFS (Front des Forces Socialistes) 15- Tifranin n tselwit: élections présidentielles 16- Agraw i Yidles d Tugdut: RCD ( Rassemblement pour la Culture et la Démocratie)