TAFSUT N YIMAZIƔEN, TAFSUT N YIMƔIDEN (AḤRIC 01)

Ayyur n yebrir d asmekti n tnekra n uɣṛef mgal tuggdi d ẓẓur. Tiɣṛi n yebrir d tin i d-yezzin i leqṛun, seg yidammen yuzzlen deg Sirṭa ar wid n Xerraṭa tekkeḍ-d s tecraḍ i d-ǧǧan yisardasen n Σuqba d wid n Barbarus. Tiɣṛi n yebrir d tin yezzin ɣef tudrin d yiɣeṛman s ccna n teslulit. Tiɣṛi n yebrir d tin n wassa d uzekka, d tamuɣli n tmetti tamaynut. Tiɣṛi n yebrir d tin Yimaziɣen d yimɣiden.

Tafsut-nneɣ ur tebdi ara kan di yebrir 1980 neɣ di yebrir 2001, maca tafsut-nneɣ tsuɛef-d ussan n ugris yerẓan afriwen n ugdiḍ yeqquṛen ɣef useklu d wussan n uɣuṛaṛ n unebdu yeǧǧan agdiḍ yettmettat seg ffad. Tafsut-nneɣ tezgel-itt tefsut, tafsut-nneɣ d idammen yessan ajeǧǧig , tafsut-nneɣ d asennan yentan deg wulawen-nneɣ.

Tafsut n Yimaziɣen teffeɣ-d seg tesdawit n Tizi Wezzu di meɣṛes 1980. Ass n 10 di meɣṛes 1980, inelmaden n tesdawit n Tizi Wezzu suddsen-d yiwen n usarag anda amaru Mulud at Mɛemmeṛ ara d-yawin awal ɣef udlis-ines " les poèmes Kabyles anciens ", s teqbaylit " Isefra iqburen n leqbayel ".

Adabu azzayri d win yugin asarag-a, yeṭṭef Mulud at Mɛemmeṛ d Salem Caker di lkumisarya almi d 16:30 n tmeddit i asen-d-iserreḥ. Deg yiḍ-nni, deg yiwet n texxamt tasdawant , 03 n yinelmaden; Lɛaziz Ṭari, Jiṛaṛ Yedris Laɛmaṛi d Ḥmed Ṭaleb ffɣen-d s teɣtest n tikli di temdint n Tizi Wezzu. Tikti-a n tikli tella-d sɣur mass Lɛaziz Ṭari.

Mi d-walan iɛeggalen n tmezduɣin tisdawanin, inelmaden gezment di ṛṛay : ass n 11 meɣṛes ɣef 09:00 n tnezzayt deg tesdawit n Tizi Wezzu ad yili ugraw amatu seld tikli. Agraw amatu ur yeqqim ara aṭas n wakud almi i d-ffɣen s ibardan n yiɣṛem n Tizi Wezzu. Inelmaden n tesdawit n Tizi Wezzu rrẓan asalu n tuggdi, kecmen deg umezruy imi d ta i d tikli tamenzut deg umezruy n Lezzayer n tallit n timunnent. Amennuɣ yeffeɣ-d si tesdawit ɣer ubrid, imdanen gren-as irebbi i teɣṛi n tlelli. Ass n 26 di meɣṛes 1980, tikli di Lezzayer tamanaɣt, iɣallen n teɣellist d wid yemmugren s tekriḍt imesbaninyen.

Deg wayyur n yebrir, ad ilin isundiden deg deg waṭas n yigzumen am tdawsa d temguri. Ixeddamen n lluzin n Wad Σisi d yixeddamen n sbiṭar n Tizi Wezzu xedmen asunded. Si tama-nsen, inelmaden n tesdawit n Tizi Wezzu belɛen tasdawit.

Sbedden-d at umbiwel-a, aselway n tmurt n Lezzayer di tallit-nni , Cadli Ben Ǧdid , yemmeslay-d i uɣṛef azzayri , ass n 17 yebrir 1980, anda i d-yenna Lezzayer d taɛṛabt d tineslemt, wid i d-yeffɣen s iberdan neɣ i ixdem isundiden d ccwal i bɣan i tmurt.

Iḍ n 19 ɣer 20 di yebrir 1980, iɣallen n tɣellist kecmen ɣer tmezduɣin tisdawanin. Iɣallen n tɣellist s yiḍan-nsen d tmaṭrakin-nsen wten inelmaden, ttɛeddan ɣef lḥeṛma n tnelmadin. Aɣṛef mi yesla ur yessusem ara, yeffeɣ-d ad ibeyyen lɣiḍ-is mgal tasertit n udabu azzayri i as-yekksen izerfan-is ama d imettiyen, isartanen neɣ idelsanen... atg.

Timesbaniyen uɣent-d tamurt n leqbayel meṛṛa , aṭas i yettwaṭfen, gar-asen 24 n yimeḥbas i d-yesɛeddan 03 n wayyuren deg lḥebs. Asmi i d-ffɣen, mugren-ten-id yimdanen am wasaḍen.

Deg wayyur n ɣuct n 1980, inelmaden n tesdawit n Tizi Wezzu suddsen-d timlilit n Yiɛekkuren. Deg temlilit-a yeqqimen ayyur, wid yellan deg tuddsa-ines ɛerḍen-d imura d wudmawen n tẓuri n tmurt. Deg leqdic i yeqqimen ayyur meṛṛa, wid yellan deg tuddsa bḍan leqdic ɣef 04 n tseqquma almi i d-ffɣen s yiwen n uttafttar anda i d-fkan tamuɣli-nsen ɣef Lezzayer n uzekka. Aṭas n temsal yettusqerdcen : amezruy, tasertit, tilelliyin, idles... atg. Attafttar-a n temlilit n n Yiɛekkuren d leqdic n yiwet n tsuta yebɣan Lezzayer tamaynut , Lezzayer ara yebrun i temharsit n wid yukren tilleli di 1962.

Aɛmeṛ BENḤEMMUC (Amar BENHAMOUCHE)

Tasuqilt (Traduction) 1-teɣtest , taɣtest :(décision ) 2- agraw amatu: assemblée générale 3-tuddsa: l'organisation 4-tseqquma, tiseqquma ( taseqqamutt): commissions( commission)