MAYU 1968 : TANEKRA N YINELMADEN D YIXEDDAMEN

Tanekra n mayu 1968, d tiɣṛi n yiwet n tsuta i d-yekren mgal timetti n usadur d udabu deg twacult, deg uselmed, deg yixeddim,...atg. Tusa-d deg yiwet n tallit anda ataram yedder anegmu adamsan , anerni n yimezdaɣ deg utaram d ukeččum n waṭas n yilmeẓyen ɣer tseddawiyin. Tazɣent teslal-d lɣiḍ ɣer yilmeẓyen i d-yeffɣen mgal tusdiwin, mgal tamnukda u mgal timetti n usadur.

Ass n 22 deg meɣres 1968, inelmaden ṭṭfen taseddawit Nanterre, ttsuɣun mgal ṭṭrad n Lvitnam, mgal yir tudert i ttidiren, mgal ṭṭrad asemmaḍ d nukliyir, mgal n waṭas n tɣawsiwin yeqqnen tilelli n yilmezyen n tallit-nni. Zdat n lɣiḍ n yinelmaden yugin ad yeḥbes, imḍebren n tseddawit sawlen-d ɣer uneḥbus n ulmad deg tzeddayt n tsekla.

Inelmaden ur qqimen ara di Nanterre, ṭṭfen diɣen taseddawit n Ṣurbun maca dinna yella-d cwal ameqqran gar yinelmaden d yiɣallen n tɣellist. Imḍebṛen n tseddawit n Ṣurbun ssawlen-d ad tt-qeflen yerna ad ḥebsen almad. Aseqqi yeḥma gar yinemaden d yiɣallen n tɣellist, imi inelmaden qeflen iberdan d tseddawen rnan kecmen deg yimenɣi d yiɣallen n tɣellist i mugren s yidɣaɣen. Ass 10 mayu 1968 azniq alatini ( quartier latin) deg Lpari qeflen-t yinelmaden.

Seg useggas n 1967, ixeddamen deg Fransa ttcetkin si ccumaj, amgarad n yiɣṛuden d usubbu deg lexlaṣ n uxeddam. Tanekra n tseddawit tenǧeɛ-iten-id, seg wussan imenza n magu ssawlen-d i tallelt n yinelmaden deg umennuɣ-nsen.

Asunded amenzu n yixeddamrn, yella-d ass n 14 mayu 1968 deg yiwen n lluzin, sdat n temdit n Nunt (Nantes). Seg yimiren ixeddamen kecmen deg tuṭṭfa n lluzinat d isundiden imuqqranen am usunded ameqqran n 20 mayu 1968 iwumi i d-yerra i teɣṛi-ines 10 imelyunen d axeddam. I waṭas n wussan , aṭas n yigzumen am temguri, asiweḍ d tfellaḥt d wid yettwaceklen.

Inmula , ikabaren d tuddsiwin n tama tazelmaḍt ama d timezduklanin , d tinemlayin naɣ d tiwarnaḍin xedmen leḥris ameqqran ɣef udabu DuGul (De Gaule), i yellan ɣef uqerru n tmurt di tallit-nni. Sdat n teswiɛt iluɣen llan-d yimsisiyen Grenelle deg 25 d 26 mayu 1968. Imsisiyen-a i d-yesuddes unabaḍ n Jurj Pumidu (Georges Pompidou) tessemlal-d imgensasen n tuddsiwin n yinmula d imgensasen n tuddsiwin n yemkaṛwa (ipaṭrunen). Ayen i d-wwin yemsisiyen-a : asali s wazal n 35% n uɣṛud n uxeddam d uslali n tegzemt tanmalut n tkkebbanit.

Tanekra n mayu n 1968, d tin yugin tasihrant d tsertit n umaḍal yebɣan ad teɛfes amdan. Tanekra n mayu 1968, d lɣiḍ n yilmeẓyen d yixeddamen yebɣan ad kksen ddel wa ad sseɣlin adabu n tsihrant.

#Σmer_Benḥemmuc ( Amar BENHAMOUCHE)

Amawal (Lexique) : 1) Asadur: consommation 2) Ataram: Occident 3) Tazɣent: crise 4) Tuddsa, tuddsiwin: institution(s) 5) Tamnukda: impérialisme 6) Tazeddayt, tzeddayt: faculté académique 7) Tasekla, tsekla: littérature 8) Aɣṛud, iɣṛuden, yeɣṛuden: salaire(s) 9) Asunded, isundiden, yisundiden: grève (s) 10) Anmalu, Inmula: syndicat (s) 11) Amesduklan, (T)imezduklanen(in): communiste(s) 12) Awarnaḍ, iwarnaḍen, tiwarnaḍin: anarchiste (s) 13) Imsisi, imsisiyen: Accord(s) 14) Amgensas, imgensasen 15) Tegzemt Tanmalut n Tkkebbanit: Section Syndicale d'Entreprise 15-01) Tagzemt: section 15-02) Tanmalut: syndicale 15-03) Tkkebbanit: d'entreprise