MARIKAN: ILIZ N TEGRAWLA MGAL TAMSIRIT D TSIHRANT

Takriḍt n yimesbaniyen imarikaniyen d tin kan i d tiririt igerrzen i udabu Amarikani yerran takriḍt d aferdis ameqqṛan deg tsertit-is. Takriḍt tesɛa ugar n wudmawen deg tmurt n Marikan : asertan, tadelsant, adyani, adamsan, atg. Di Marikan tudert tuɛeṛ, imdanen xedmen ugar n tezmert-nsen imi yiwen n uɣṛud ur d-ikeffu ara di taggara n wayyur.

Ass n 25 mayu 2020 Jyurj Fluyd (George Floyd) yiwen n uberkan n 46 d aseggas yenɣa-t umsaltu deg yiɣṛem n Minyapulis (Minneapolis) deg uwanek n Miniẓuṭa (Minnesota). Timenɣiwt-a tegla-d s lɣiḍ d usḥissef ameqqṛan deg tmurt n Σemmi Ṣam.

Zdat n lɣiḍ d tmesbaniyin i d-yellan seld timenɣiwt n Jyurj Fluyd (George Floyd), anebbaḍ n Miniẓuṭa (Minnesota) yessuter 13000 n yiserdasen n tiḍaf taɣelnawt n uwanek u yessuter diɣen tallelt i uneɣlaf n temḥaddit. Ajajiḥ n lɣiḍ yuɣ akk timdinin timeqqṛanin n Marikan , di taggara n dduṛt-a azal n 340 n yimesbaniyen i d-yettwaṭfen di New Yuṛk (New-York), azal n 50 n tkeryas n yimsulta i d-yettwaseṛɣen. Di Wacinṭun (Washington), imesbaniyen wwḍen almi d zdat uxxam amellal (Withe House) anda ttsuɣun: Black live matter (tudert n yiberkanen tesɛa azal), i can't breathe ( ur zmireɣ ara ad snufseɣ).

Tanekkra n tikelt-a di Marikan tesdukkel akk imarikaniyen mgal tamsirit u diɣen tesdukl-iten mgal tasertit talibiṛalt n unagraw amarikani. Tagrawla-ya tefka-d udem n umennuɣ n tesrekmin , n wid yenḥafen mgal wid iḥeqqṛen d wid yeččan tidi n uxeddam d umur n uẓawali.

Tugdi d tin i d-yebanen ɣef tserkemt yeṭṭfen adabu deg Marikan d umaḍal s umata , imi aɣelluy n unagraw alibirali di Marikan d aɣelluy-is deg tmura n umaḍal summata. Aselway n Marikan Donel Trump yessenṭeɛ ccwalat-a i d-yellan i yimezduklanen d yiwernaḍen. Dunelm Tramp (Dunelm Trump) ur d yendih ara i talwit maca yessawel-d ad qaṛɛen imdanen-a u yenna-d: "Ur ilaq ara ad neǧ tarbaɛt tamecṭuḥt n yimenɣan d yiwundalen ad hudden iɣeṛman-nneɣ."

Σmeṛ BENḤEMMUC (Amar BENHAMOUCHE)

Amawal (Lexique)

01) Tamsirit: racisme

02) Tasihrant : capitalisme

03) Takriḍt: violence

04) Aferdis: élément

05) Aɣṛud, uɣṛud: salaire

06) Anebbaḍ: gouverneur

07) Aserdas, isardasen, yiserdasen: soldats

08) Tiḍaf: garde

10) Anagraw, unagraw: système

11) Taserkemt, tisrekmin, tesrekmin: classe(s) sociale(s)

12) Amesduklan, imesduklanen, yimezduklanen: communiste(s)

13) Awernaḍ, iwernaḍen, yiwernaḍen: anarchiste (s)

14: iɣṛem, iɣeṛman: ville(s)