IXEDDAMEN N NUMILOG , UR TTṚUZUN UR KENNUN.

Amennuɣ, d win yettkemmilen gar yixeddamen n tkkebbanit NUMILOG yettabaɛen takkebbanit tayemmat CIVITAL akked tnemhalt n tkkebbanit-a, i d-iɛefsen izerfan n uxeddam. Maca, d acu-tt temsalt-a yessuzlen aṭas awal ussan-a inegura?

Di 03 yulyu 2020, 03 n yixeddamen, testaxṛi-ten-id tnemhalt n NUMILOG acku bɣan ad d-slalen yiwen n unmalu ad yennaɣen ɣef yizerfan n yixeddamen. Ikamaraden-nsen d wid yeṭṭef lɣiḍ dɣa ur ɛeṭṭlen ara sawlen-d ɣer yiwen usunded ameqqran. Azal n 15 n wussan, ixeddamen n NUMILOG d nutni d ibeddi zdat n wadeg n uxeddim-nsen, ttsuɣun izerfan-nsen d tlelli n leqdic anmalay.

Lɣiḍ-a n yixeddamen yegla-d s ustixer n 198 n yixeddamen yellan ɣer tama n 03 n yikamraden-nsen yettwaqecɛen seg yixeddim asmi bɣan ad d-slalen tuddsa tamnalunt deg tkkebbannit n NUMILOG. Deg ukemmel n umennuɣ-nsen, ixeddamen n NUMILOG suddsen-d yiwet n tikli tameqqṛant ass n 10 ctember 2020, anda i d-lḥan seg tnemhalt tasenzant n CIVITAL ar uxxam n teɣdemt n Bgayet.

Ayen yewwin lwelha-nneɣ, d tasusmi n wid yeddan d upatṛun n CIVITAL deg Lḥiṛak, wid i d-yennan: meskin yettwaḥqeṛ, ḥeqqrent acku d aqbayli, ɣer tagara deg usfuǧǧeɣ n wid yerẓan amennuɣ n tserkemt n yimelliẓen. Ikabaren iburjwaten, ssusmen zdat n zizi-nsen Rebrab. Si tama niḍen, tiliẓri n BRTV teɣḍel di ccan n tɣamsa acku tedda d tama n tnemhalt n NUMILOG. Deg yiwen n usimel, BRTV telḥeq awal i kra n yixeddamen i d-tesbedd tnemhalt ad d-inin yelha lḥal, ur ixuṣ kra deg tkkebanit-nsen, rnan nna-d belli wid yellan deg usunded-a d at cwal.

Aqbayli yettwaɛfsen ɣer kra n yimdanen, ziɣen d netta i yetteɛfasen imelliẓen. Ass n 18 ɣuct 2020, Rebrab yemlal aselway n tegduda tazzayrit d iɛeyyalen n unabaḍ-is deg usarag aɣelnaw i d-yewwin awal ɣef tsertit tadamsant tamayanut n Lezzayer. Amennuɣ-nneɣ d win n tserkemt n yimɣiden mgal imsihranen d tsihrant.

Ixeddamen akk n Lezzayer, ilit am wid n NUMILOG !

Σmeṛ BENḤEMMUC (Amar BENHAMOUCHE).

Amawal (Lexique):

1) anmalu, ummalu, tanmalunt: syndicat, syndicale

02) tanemhalt, tnemhalt: direction

03) adeg n uxeddim: site de travail

04)taɣdemt, teɣdemt: justice

05) tanemhalt tasenzant: direction commerciale

06) tuddsa tamnalunt : organisation syndicale

07) taserkemt, tserkemt: classe sociale

08) asimel, usimel: reportage

09: amsihran, imsihran: capitaliste(s)