ASDAWAN, GAR TΓIMIT D TUFFΓA

Iseggasen-a ineggura, aṭas i d-yetteffɣen di tesdawiyin s yigerdasen n Lisuns, Master neɣ dukṭura. Tuget n wid i d-yetteffɣen ur d-ttafen ara ixeddim s uɣrud i bɣan. Xeddmen s yigatuyen " ANEM" n 18000 Idinaṛen i wayyur, ayagi ma ufan ixeddim deg uḥric n leqṛaya-nsen, wammag ttegrayen-d akk di ccumaj. Diɣen, llan yiɣeblan n wallalen n uselmed d imasayen n uselmed di tmurt ur d-yefkin ara tallelt i unadi ussnan di tesdawiyin.

Inig, yuɣal d tifrat, regglen akk Ɣur-s yinelmaden-nneɣ. Send ad awḍen, aṭas n tirga i d-yettɛeddayen deg yiqeṛṛa-nsen. Tuget, nwan akal n yinig d lǧennet, ayen iɣef nedhen ad d-yaweḍ ɣuṛ-sen imir. Mi wwḍen ad magren tilawt, tin ur d-nɛedda ara akk deg yiqeṛṛa-nsen. Tadrimt i d-wwin yid-sen, ur d-tkeffun ara akken ad idiren akken bɣan. Di taggara, ad d-afen iman-nsen gar sin n yiberdan: yiwen yettara ɣer ulmad, wayeḍ ɣer yixeddim.

Timura yennernan deg tdamsa am Fṛansa, ufant deg yinelmaden-agi i d-yettasen deg tmura n unẓul, lfayda akken ad ččaṛen taxṛiḍt-nsen.Wid d-yettasen di tmura n llaẓ d lixṢaṢ, ttafen-d di tmura-agi n yinig anda ad ččaṛen leǧyub-nsen, rnu ad ččen, ad swen, ad ḥewsen wa ad zhun. Ayen akk i ulac di tmurt-nsen, ha-t-an ufan-t deg yinig, maca ayen ur zṛin ara, ixeddim-agi xeddmen, d win ttaggin yifransisen ad t-xedmen, ɣef waya s ugatuy yellan di tuget, ddaw n win n mmi-s n tmurt-nni n yinig.

Wid iḍefṛen almad, tikkwal, ɣas ad d-awin agerdas-nsen ur d-ttafen ara ixeddim, acku d ibeṛṛaniyen. Tuget deg-sen, ur zmiren ara ad uɣalen ɣer tmurt, acku akken i as-yenna winna: "win iɛerḍen tacriḥt n tsekkurt, ur iqenneɛ ara". D acu i asen-d-yeggran, d arcal kan, neɣ ad d-slalen takebbanit akken xeddmen yinelmaden izzayriyen, acku d azref i d-yettuleḥqen i yesdawanen izzayriyen deg usseggas 1968

Deg ussan-a n unfafad n Kuṛuna(Corona) id yuɣen akk amaḍal, isdawanen izzayriyen d wid yetmarmden deg inig. Di Fṛansa, qimen kebblen deg texxamin n tmezduɣin tisdawanin. Taggnitt-a terra inelmaden ttidiren di yir liḥala : ṭiq, ɛeyyu n wallaɣ d lixṣaṣ n tedrimt d tgella, atg.

Yenna-as Muḥya: "timura n medden akk yiwet, nekk snat ay sɛiƔ". Akka, ulac win yuksanen: anda i d-lulen, ttwaḥqṛen; anda i d-usan, d ibeṛṛaniyen! Ahat ad d-yass wass anda tamurt ad tuɣal gar yifassen n uɣṛef ( ixeddamen , yiɣallen iburen d ilmeẓyen), asuki n tmussni d tnemla tagrawlant ad yessɛder, ixeddim diɣen ad yili, akka ilmeẓyen ad afen tilelli i ttnadin.

Aɛmeṛ Benḥemmuc( Amar BENHAMOUCHE