ANFAFAD N KUṚUNA YESSENΣET-D UDEM N UNAGRAW N MARIKAN

Di tazwara n unfafad-a n Kuṛuna , D.Trump isemma-yas anfafad n Ccinwa. Ɣas ma imussnawen d wid ixedmen deg tdawsa sawlen-d ɣer ukman maca yeqqim iɛuẓẓeg. Ar yiḍelli 14 yebril 2020, uṭṭun n wid yenṭeḍ unfafad-a yewweḍ ɣer 585.000 u wid d tid yemmuten leḥsab yewweḍ ɣer 24.000.

Aṭas n tkebbaniyin medlent tiwwura-nsent acku ur zmirent ara ad xelṣent tabzert i tsuddiwin n yiwanaken d yiɣeṛman (timdinin). Aṭas diɣen n temdinin d yiwunak i d-yebdan tasertit n usqucceḍ d userxef deg tedrimt yettṛuḥun ɣer usiweḍ, asedwel d tdawsa. Deg tedrimt-a nezmer ad d-nebder 1,31 d amelyaṛ n dulaṛ anda 264 n yimelyunen n yidulaṛen deg ugzum n usedwel. Zdat teswiɛt-a , Agraw n Yiwunak Yeddukklen (United States Congress) yelḥaq azal n 2000 n yimelyaṛen n yidulaṛen d tallelt i tkebbaniyin timeqqṛanin.

Tawaɣit-a tuɣ-d tamurt meṛṛa, maca tessenɛet-d ahruri n unagraw adawsan , asertan, anmetti n Marikan. Di tmurt n Marikan, 30 n yimelyunen d amdan ur nesεi ara asenkid n tezmart. Nwala deg tezɣent-a tadawsant tamsirit mgal iberkanen, imi deg temdit n Cikagu (Chicago) amedya: 30℅ deg yimezdaɣ-is d ibarkanen, nnig n 70℅ n wid yeṭṭef unfafad-a n Kuṛuna d ibarkanen. Deg wayyur-a. 17 n melyun d amarikani yeqqimen war ixeddim( di cumaj), uṭṭun i d-yusan nnig win yulin ɣer 14,7 n yimelyunen di yunyu 2009. Imarikaniyen ttsuɣun , aṭas i d-yeggran i llaẓ ulac taggella ladɣa wid ur nesɛi ixeddim , ibarkanen, ilaṭiniyen d iminigen war lekwaɣeḍ ur nesɛi tallelt n uwanek. Nezṛa diɣen amek ddin mazal yesɛa amḍiq-is deg tmetti tamarikanit, imi deg Fluṛid (Floride), yiwen n upastur yeẓẓul d yimdanen snat n tikwal ass n 29 di meɣṛes yezrin, ɣas ma imḍebṛen n Fluṛid (Floride) ugin anejmaɛ n yimdanen deg tallit-a n unfafad n Kuṛuna.

Assa , imdanen faqen s wansa i d-tekka tyita. Tiyita tekka-d seg unagraw asihran yerẓan tayet n uxeddam, yenɣan asirem n yilemẓiyen d yiɣallen i iburen. Deg wussan-a taserkemt taxeddamt d tin i d-yukin imi 70 n yisundiden deg tmurt maṛṛa. Ḥala tadukkli n yixeddamen d yiɣallen i iburen ara yeṛzen adabu n tsihrant, ara d-yessufɣen talsa ɣer tudert yelhan.

Aɛmeṛ BENḤEMMUC (Amar BENHAMOUCHE)

Tasuqilt( Traduction)

1- Anagraw: système 2-tsuddiwin( tasuddut, tisuddiwin) : institutions 3- tadawsa: santé comme secteur ) 4- ugzum (agzum) n usedwel (asedwel) ( secteur de l'éducation) 5- asenkid n tezmart: assurance santé 6- tamsirit: racisme 7-taserkemt taxeddamt: classe ouvrière 8- 70 n yisundiden (isundiden, asunded): grève (s)